جريدة الدستور || تنفيييس: وجه الشبه بين المواطن و راس البصل * كامل النصيرات

تنفيييس: وجه الشبه بين المواطن و راس البصل * كامل النصيرات

أولاً : إثنيناتهم بينفرموا ..سواء فرامة ناعمة أو خشنة أو أي فرامة تخطر على بالكْ.

ثانياً : إثنيناتهم بتشيلهم و بتحطهم وين ما بدّك ..يعني سهل جدا إنك تتنقّل فيهم.

ثالثاً : إثنيناتهم أمرهم مش بإيدهم ..أمرهم بإيد إللي يستعملهم ..يعني مسيّرين بكل شي بحياتهم.

رابعاً : إثنيناتهم بًـبَكّوك..و يخلّوا دموعك تهطل من عيونك هطل ..و ما فيه مجال إلا تبكي منهم و عليهم.

خامساً : إثنيناتهم بشاركوا في المظاهرات ..اعطوني مظاهرة ما فيها مواطن وما فيها بصل كمان ..،،.

سادساً : إثنيناتهم يتفشخروا على الفاضي..و يعتبروا حالهم روس ..أي مواطن عندنا شايف حالو راس ..وراس البصل مهو راس أصلاً .

سابعاً : إثنيناتهم على قَدْ الإيد ..و الكبير فيهم مقدور عليه ..راس البصل تمسكه بإيد وحدة و المواطن طلع والا نزل برضو تمسكه بإيد وحدة ..،،.

ثامناً : إثنيناتهم مهما ارتفع سعرهم ما بينفقدوا ..بتلاقيهم وين ما تروح و عندنا منهم كثير .

تاسعاً : إثنيناتهم مهما غسلتهم او نظفتهم بتظل ريحتهم طالعة و بتعرفهم عن بُعد .

عاشراً : اترك ما تبقّى من تشابه لك أيها القارئ المواطن ..لكن تذكر أنّ أهم وجه شبه بين المواطن و رأس البصل هو : إنك لن تضعهما على رأسك أبداً أبداً أبداً ..،،.

abo_watan@yahoo.com

التاريخ : 15-06-2008

1- صباح البصل !!

أبوتايه الحويطي || 6/14/2008 11:57:28 PM بتوقيت الأردن

السلام عليكم
شو جاب سيرة البصل عندك أبو وطن ؟
أزيدك كمان :
إثنيناتهم يدفنوا تحت التراب
ودمتم سالمين

2- petra

مواطن من وطن || 6/15/2008 6:28:01 AM بتوقيت الأردن

البصل غالي كثير بس المواطن رخيص كثير والبصل نعمة والمواطن نقمة على نفسه وعلى غيره............الخ

3- تكمله

اهبل || 6/15/2008 6:36:21 AM بتوقيت الأردن

إثنيناتهم بتاكلوا و واللي بوكلهم ما يقرب الجامع .

4- وجه الشبه

ابو قتيبة || 6/15/2008 6:50:18 AM بتوقيت الأردن

بس البصل له فوائد عدة وما فيه اكلة الا وتجده فيها اساسي بس نحن وين فوائدنا واين تجدنا

5- تشابهات

سامر زكي المدانات/ الإمارات العربية المتحدة || 6/15/2008 7:34:18 AM بتوقيت الأردن

بس اثنيناته مهمين لأي طبخة، حتى في المقبلات كالسلطة والسلطة (بضم العين) ههه.
واثنيناتهم أرخص شيء في السوق.
واثنيناتهم ما بتاكلوا لحالهم، فالبصل لا بد أن يكون معه بندورة و خيار، والمواطن لازم أرضه وبلده معاه، حتى يستطعم اللي أكل ويأكل واللي ناوي يوكل.
اثنيناتهم يعتبروا من فاتحي الشهية.
أسعد الله صباحك

6- هذا المقال غير لائق

محمد شريف/البحرين || 6/15/2008 7:35:39 AM بتوقيت الأردن

هذا المقال غير لائق لعدة اسباب
1) الكتابة بالعامية وهذا غير لائق على الاقل بجريدتكم الغراء
2)المواطن هو من بني ادم الذين كرمهم الله في كتابه
3)المواطن في الاردن هو مسلم وهو من خير امة اخرجت للناس
4) المواطن الاردني هو مواطن عربي من حملة الاسلام
5)المواطن الاردني هو محترم اينما وجد ويفرض احترامه اينما كان
6)ماذا يفهم غير الاردنيين من هذا المقال؟

7- أحلى صباح

أبو الأيهم - أبو ظبي || 6/15/2008 7:37:03 AM بتوقيت الأردن

يعني هذا أحلى صباح لأنه مفعم بريحة البصل ، أبدعت كالعادة أبو وطن دمت ودام قلمك الحر .

8- للتذكر

ابو فارس || 6/15/2008 7:44:30 AM بتوقيت الأردن

واثنيناتهم بتقدر تحشر كل مئة في شوال

9- بصل يا بصل

عاصم الطراونة _ ابوظبي || 6/15/2008 8:07:59 AM بتوقيت الأردن

كلامك مضحك مبكي مثلما عودتنا بس يمكن البصل بيغلى سعره هالايام بس احنا شو رأيك ؟

10- الى الاخ محمد شريف/البحرين

محمد رشدي || 6/15/2008 9:35:35 AM بتوقيت الأردن

اللي ايده بالمي مش زي اللي ايده بالنار ...
ذكرتني باللي قالت عن الناس اللي مش لاقيين خبز ياكلوه ليش ما يوكلو بسكوت
تحياتي لكامل ... احكي زي ما بدك ولا يهمك ... احنا فاهمين عليك

11- ساجدة

راس البصل || 6/15/2008 10:09:22 AM بتوقيت الأردن

راس البصل أفضل منالمواطن بكفي انه البصل يستفاد منه بس الثاني لا

12- بصل مابى بصل

حاتم فائق النابلسي || 6/15/2008 10:21:01 AM بتوقيت الأردن

اخ اخ اخ اللهما اذا كانت الحياة لي خيرا فاحينى واذا كن الموت تى شرا فأ متني بتعرف أنه صار اهبل صار الواحد يحكي مع حاله ظربت الفيوزات كلها كونتك

13- أنا برضو

ما غيرو || 6/15/2008 10:38:46 AM بتوقيت الأردن

عليك اللحمة.. هالمرة بالبصل. مع الاعتذار لجورج سيدهم

14- البصل مو مهم طالما ما بنحط على المنسف

بصلة || 6/15/2008 10:48:29 AM بتوقيت الأردن

هناك فرق عظيم بين البصل والانسان البصل اله فائدة اما المواطن ما اله فائدة
البصل اله سعر بطلع وبنزل اما المواطن ما اله سعر ... انزل على الشارع وحمل بكب مواطنيين ببلاش
يعني بدك اعدد فروقات بعدد

15- فداء الاردن

جمال العدوان || 6/15/2008 10:49:57 AM بتوقيت الأردن

مايطلعلك تحكي على المواطن الاردني والحمدلله عايشين بأمن واستقرارواحسن من غيرنا بكثير وهاماتنا مرفوعة بوجود سيدناابوحسين ولاتنكر خير الكرامة

16- المواطن والبصل

ابو البصل || 6/15/2008 11:14:52 AM بتوقيت الأردن

و من عندي يا ابو وطن:
راس البصل بفتح النفس على الاكل
والمواطن ايضا فاتح شهية الحكومه على نهشو نهش

17- الى الاخ محمد رشدي

عبيدات || 6/15/2008 11:36:25 AM بتوقيت الأردن

الى الاخ محمد رشدي صاحب المشاركه10
الاخ البحريني ما قصد شي و هو ما قال انه مش فاهم و انه الاردني عايش بنعيم بس هو حاول يرقيك شوي لأنك مفترض اتكون انسان حتى ولو عندك هيك حكومه و بعدين هو ما منع الاخ كامل يحكي مثل ما بده.
تحياتي الك و تحياتي لكل واحد اردني.

18- لاوطن بدون مواطن حر

جمال العدوان || 6/15/2008 11:39:19 AM بتوقيت الأردن

صح لسانك يامحمدالشريف ونعتز بوطنيتناوإذا في حدا شايف حاله راس بصل ينشف حاله بشمس الغور واناابيعه بسعر عالي ورجاءا ياكامل لاتحكي بإسم المواطن الاردني كل واحد يمثل حاله

19- المقال ليس إساءة للاردنيين

ام لولو || 6/15/2008 11:42:54 AM بتوقيت الأردن

أتحدى كل من كان اذا في شك بوطنية ابو وطن، والمقال يا شباب مكتوب بتهكم ليس على شخص الاردني فالكاتب اردني حتى النخاع ولن يسيء لبلده او نفسه، ولكن الهدف القراءة بين السطور ونحن الاردنيه بنفهم على بعض، فعذرا للذين اساءو فهم المقال ويبقى الاردني تاج على راس العرب بكرامته وحبه ونخوته واخلاصه وشجاعته وتضحيته وحبه للاوطان، وكثير كثير صفاته فلا تغيرو مقصد المقال ومساء الخير للجميع وللوطن الغالي الاردن.

20- صباحك بصل

الطائر الحزين || 6/15/2008 11:57:41 AM بتوقيت الأردن

دائما بتضحكنا يا ابو وطن ، شو هالمقالات الرائعة ، هناك تشابه ايضا : راس البصل ما بنوكله الا بعد ما نقشره ، والمواطن ما بيمشي الا بالتشليح .

21- فهمها لحالو

نمس || 6/15/2008 12:18:38 PM بتوقيت الأردن

الى صاحب التعليق رقم 15 :الزلمه حكى عن راس البصل مش على المواطن الاردني :كيف افهمتها لحالك...... مبين عليك ذكي يا نمس

22- شو هالحكي

ناريمان النسور || 6/15/2008 12:25:12 PM بتوقيت الأردن

يا أستاذي العزيز راح عنك أهم نقطة وهي النقطة الثامنة ، وحابة أحكيلك بالعكس ، راس البصل هالأيام أغلى من راس البني آدم نفسه .. مو منيح بحق البصل تخليه يتساوى مع المواطن وتبخس قيمته بهالشكل ، لإنه البصل بظل بصل اله أهميته ومكانته ،

23- بصراحة وعن جد

ناريمان النسور || 6/15/2008 12:28:15 PM بتوقيت الأردن

والله بدك الصراحة وعن جد وبدون تخويث ،، والله الملك مو مقصر معنا وحاطنا فوق راسه ، بس العيب والحق عاللي حواليه ،، اللي برسموا وبنفذوا ، ولازم تحاول تكتب مقال آخر وتعمل وجه الشبه أو وجه الفرق بين الحكومة وسن الثومة .. وبتكون هيك كفيت ووفيت ،،

24- رد على المقال رقم 6 الأستاذ محمد شريف من البحرين

أم البصل || 6/15/2008 12:34:33 PM بتوقيت الأردن

يا داخل من البصلة وقشرتها ما نابك غير رحتها ..

25- ليش

ايفي || 6/15/2008 12:41:44 PM بتوقيت الأردن

ليش بتهبطوا معنويات المواطن الاردني وبتناقضو حالكم المواطن الاردني غالي وعمره ماكان رخيص ولايقارن بالبصل يمكن الوضع صعب بالاردن بس الحمدلله ولسنا الوحيدين في الوطن العربي من نعاني اكتر الدول العربيه وحتى الاجنبيه لديها مشاكله
ونحمد الله على اي حال

26- كلنا للوطن والمواطن

جمال العدوان || 6/15/2008 12:54:09 PM بتوقيت الأردن

معلش ياابو تنفيسة زاكية وين تنفيساتك عن إللي يحاولوا يعملوا بلبلة بهذا الوطن الغالي؟وين تنفيساتك عن الجرائم الجماعية بحق المسلمين والمسلمات والاطفال؟وين تنفيساتك عن اخواننا الفلسطينين؟ وين تنفيساتك عن حصار غزة؟وين تنفيساتك عن استغلال النفط العربي؟يااخي وين انت عايش؟وقلمك مايكتب الا عن هذا الوطن والمواطن؟يااخي إحمد ربك واشكره على هذه النعمة نعمة الامن والامان

27- عيب

نداء حمدي عيد الشويخ || 6/15/2008 1:01:42 PM بتوقيت الأردن

عيب أن تشبه الإنسان الذي كرمه الله برأس بصل

28- الى العدوان

ملتعن رفبة جد جده || 6/15/2008 1:15:24 PM بتوقيت الأردن

الى جمال العدوان والله يا خالي منته عايش بالبلد بتدريش الناس ملتعن سلسفيلها اي المواطن اذا بطلعلة راس بصل يحمد الله ؟كأنك بتفكر الناس ملوك اي الناس مكتحة معها والشكوى لغير الله مذلة بس ظلوا انتوا طبلوا وزمروا وهزوا ذنب الوطنية وحب القادة العمل وتظافر الجهود وتصحيح الخطا مش هز ذنب اذا بدك تعرف الاردني قديش مذلول شوفة شلون وضعة بالخليج القرد احسن منه واني واحد منهم بس يا خالي الي مثلك شكلك جايك طوز ومش شايف اكثر من متر قدامك او ابعد من راس خشمك بالكثير وارجو يا دستور النشر بدون قصقصة

29- سيد كامل نصيرات

مهستر || 6/15/2008 1:30:31 PM بتوقيت الأردن

مقالك غير موفق اليوم
وحسب رايي لا يقارن
المواطن بالبصل.
اذأ قارن بين
المسؤول بكره بمقالك
وبين الفجل او الثوم
او المرأه والملح.
احترامي واختلاف الراي لا
يفسد بالود قضيه.

30- الى تعليق رقم 17

محمد رشدي || 6/15/2008 2:00:50 PM بتوقيت الأردن

تحياتي الك ... بس فيه فكرة غلط مش فاهم من وين جاي انه اللي بينتقد وضع معين مو وطني وما عنده ولاء واخلاص وانتماء... يا جماعة والله حرام عليكم هيك... فالوطن ام النا كلنا وما فيه حدا فينا ما بحب امه

31- الى جمال العدوان تعليق 26

روزانا السيد || 6/15/2008 2:56:23 PM بتوقيت الأردن

ياخي الفاضل بالظاهر انك مش متابع كويس مقالات الكاتب التي كانت عناوينها كل الذي ذكرت والواضح انك داخل تنتقد فقط للانتقاد
نحمد الله على الامن والامان وادام الله جلالة الملك تاج على رؤوسنا

32- الى محمد شريف وجمال العدوان

كريمه وهاب || 6/15/2008 3:07:20 PM بتوقيت الأردن

مافي داعي للمزايده على الولاء للاردن واحة الامان لجميع العرب واذا ما فهمتوا الي بين السطور هذا شأنكم لان المتابع لكتابات كامل النصيرات يعي حجم الحب والولاء للاردن وليش زعلانين مهو فعلا صار المواطن ارخص من الفجل ماعدا انتما ماشاء الله عنكم اغلى ما يملك الوطن
اقرأوا مليح ياخوان وتحياتي لاهل الغور الصامد

33- بصل اخضر

محمد ابو غوش-تربوي || 6/15/2008 3:14:06 PM بتوقيت الأردن

الاخ كامل نصيرات وبعد فاتك شيء ما بينت وجه الشبه بين البصل الاخضر والمواطن ارجو ان تكون في تعليق اليوم الذي يليه وشكرا

34- ملتعن رقبة جد جده

جمال العدوان || 6/15/2008 3:15:14 PM بتوقيت الأردن

والله ياصاحبي لو إنك بين ربعك وناسك مايلحقك ظيم وانت اخترت الغربة بدك تتحمل مأسيها والغربة صعبة وانا الحمدلله والله نظرتي حادة وثاقبة وبعرف شو انت بالخليج!والحمدلله مابنهز ذنب ولا طاعة للمخلوق وبلادنا الحمدلله مافيها طوز مثل عيشتك بالخليج وإذا بدك نصيحتي إرجع لبلادك وعيش فيهابكرامة وسيدنا ابو حسين مابنسى حدا بمكارمه ونخوة الاردنيين مابتتخلى عن المحتاج والله لايحيجنا لمخلوق!

35- بصل

مرام || 6/15/2008 4:32:57 PM بتوقيت الأردن

يلي بياكل بصل بينسى يلي حصل ..بس يلي بياكل مواطن بصير يا نائب يا وزير....

36- كاريكاتير

لا اسمع لا ارى لا اتكلم || 6/15/2008 7:47:40 PM بتوقيت الأردن

لو انك مخبر صحفى او محلل سياسى لطالبناك ان تغمد قلمك اسبوعا عقابا لك لان واقع الحال ليس كما توحى اطلاقا....لكن بما انك كاتب اديب و محبوب ترسم البسمة بهذةالكاريكاتيرز(جمع كاريكاتيرات على ما اظن) التى ترسمها كل يوم رتوشا و تفاصيلا و ايماءات موحيا بما تخشاة ان يؤل الحال الية و منبها و ناصحا و محذرا فاننا(اى انا و نفسى و ذاتى و عقلى و جميعى )نسامحك
على ان قدرك ان صحيفتك التى تكتب فيها ما عادت محلية و لان اهل مكة فقط هم هن ادرى بشعابها فانا نخشى ان يساء فهمك
لو تعلم.... ان القمر الذى يعبر السماء كل ليلة لا يكون بهيا الا عندما يمر فوق هذا الوطن و اهلة و كذلك اشراقة شمس كل صباح.
لك منى تحية وسلام

37- رد على الاخ محمد شريف بالتعليق رقم 6

اردني حتى العظم || 6/16/2008 12:12:24 AM بتوقيت الأردن

الظاهر إنك بتيجي زيارة لعند اهلك مرة كل عشر سنوات وما بتعرفش كيف كرامة الواحد صارت هون يا اخ محمد شريف الراتب مش مكفي فواتير كيف لما يكون عندك ابن جامعي على حسابك واهل مكه ادرى بشعابها وكاسك يا وطن

38- ممتاز

أبو آدم || 6/18/2008 3:11:44 PM بتوقيت الأردن

تشبية بليغ لايصدر إلا من مثلك ياعزيز

أدعوك لزيارة مقالى الجديد "ذوو الأقدام الكبيرة"

39- مهما كان المواطن الاردني راسو فوق

wafa || 6/18/2008 6:02:00 PM بتوقيت الأردن

راس بصل يابو وطن؟؟
شو هالريحة الفايحة!!! أقصد هالشبه الفظيع!!!
لاحول ولا قوة الا بالله ... كل واحد يشوف شو بدو يكون !!!
دام الحس والاحساس الذي يوقظ قلوبا نائمة يا وطن رح تضل عالي وغالي ,,,

40- على البصل وسنينه

botota || 7/4/2008 5:44:01 AM بتوقيت الأردن

ياعم بلاش البصل الله يرضى عليك . عارف؟ كلامك على البصل كده هيزود سعره وبعدين ماراح نلاقيه بعدين ؟ انت حر . اما المواطن الاردنى فا عزيز وغالى . تحياتى لاصدقائى الاردنية ابو ليث و زيد

41- دمت ودام قلمك المبدع

عراقية مطحونة || 7/6/2008 5:44:48 PM بتوقيت الأردن

سلمت ياأباوطن ...

وصفك ع الجرح

الاسم:
عنوان التعليق :
التعليق :

البحث والارشيف	أوقات الصلاة
حركة الطائرات	حالة الطقس
اسعار العملات	مؤشرات اقتصادية

يومية سياسية عربية مستقلة تصدر عن الشركة الاردنية للصحافة والنشر
المدير العام سيف محمود الشريف	رئيس التحرير المسؤول محمد حسن التل